Кашни халăхăн хăйĕн тăван чĕлхи пур: вырăссен – вырăс чĕлхи, чăваш халăхĕн вара – чăваш чĕлхи. Ку чĕлхепе калаçакансем – чăвашсем – Чăваш, Тутар тата Пушкăрт Республикисенче, Самар, Чĕмпĕр, Саратов, Пенза, Оренбург облаçĕсенче, Çĕпĕрте тата ытти çĕрте пурăнаççĕ. 

   Чăваш чĕлхи чăваш халăхĕн наци пуянлăхĕ пулса тăрать. Чăваш Республикин Аслă Совет Президиумĕн 1992 çулхи апрелĕн 9-мĕшĕнчи Постановленийĕпе килĕшÿллĕн ака уйăхĕн 25-мĕшĕнче, чӑваш халӑхне çутта кăлараканĕ, çĕнĕ чӑваш çырулӑхне йĕркелекенĕ Иван Яковлевич Яковлев çуралнă кун, эпир Чăваш чĕлхи кунне уявлатпăр.

   Кăçал И.Я.Яковлев çуралнăранпа 175 çул çитрĕ. Çак куна халалласа Комсомольски 2-мĕш вăтам шкулĕнче  яланхиллех уяв иртрĕ. Директор çумĕ Л.П.Абрамова пухăннисене уяв ячĕпе саламласа малашне те тăрăшса вĕренме ырлăх-сывлăх сунчĕ. Ачасем чăваш халăхне çутта кăларакан И.Я.Яковлев пурнăçĕпе паллашрĕç. Чăваш ташши, сăвви-юрри мăнаçлăн янăрарĕ. 2а, 2б, 3а, 3б, 4а, 4б класс ачисем хăйсен пултарулăхĕпе паллаштарчĕç. Марина Петухова (6к класс), Варвара Тихонова (5к класс), Виктория Хораськина (8к класс), Екатерина Петухова (9а класс), Матвей Копташкин (8а класс) куракансене сăвă каласа савăнтарчĕç. 5а, 5к класра ăс пухакансем И.Я.Яковлев çырнă „Кашкăрпа карчăк”, „Йăлăнтарни”, „Пулă тытни” хайлавĕсем тăрăх инсценировка йĕркелесе кăтартрĕç.

   Чăваш чĕлхи кунĕ ячĕпе саламласа пурне те хастарлăх сунатпăр.