Районти вĕрентÿ учрежденийĕсенче чăн-чăнах маттур та пултаруллă, хастар та тăрăшуллă ачасем пĕлÿ пухаççĕ. Çакна вĕсем тĕрлĕ конкурссенче, олимпиадăсенче, фестивальсенче малти вырăнсене йышăнса çирĕплетеççĕ. Чăвашла ăс-тăн пухакан вĕренекенсем темиçе çул ĕнтĕ республикăра чăваш чĕлхипе тата литературипе, тăван ен культурипе иртекен олимпиадăсенче малтисен шутĕнче. Кăçалхи вĕренÿ çулĕнче те Мария Минина чăваш чĕлхипе тата литературипе, Анастасия Шингаловăпа Диана Мурзаева тăван ен культурипе (виççĕшĕ те Комсомольски 2-мĕш вăтам шкулĕнчен) республикăри олимпиадăра çĕнтерÿçĕсем пулса тăчĕç. Анастасия Данилова, Анжела Андриянова, Венера Бархонова (пурте Çĕнĕ Мăрат вăтам шкулĕнчен) чăваш чĕлхипе тата литературипе республикăри олимпиадăра лайăх кăтартусемпе палăрчĕç.
Чăваш Республикин «Чăваш Республикинчи чĕлхесем çинчен» Закона пурнăçласа, чăваш чĕлхипе литературине вĕренес туртăма анлăлатас, тăван ен культурине тарăннăн тишкерес туйăма вăйлатас, пултаруллă ачасене тупса палăртас тĕллевпе тата Чăваш чĕлхи кунне халалласа çулленех наци культурин «Туслăх хĕлхемĕ» фестивалĕ иртет. Районти чăвашлăхшăн ырми-канми вăй хуракан вĕрентекенсемпе чăваш тумĕпе капăрланнă вĕренекенсем кăçал Комсомольски 2-мĕш вăтам шкулне пуçтарăнчĕç. Уява пухăннисене вĕренÿ пайĕн методисчĕ В.Г.Петрова саламласа ăнăçÿ сунчĕ, уяв программипе паллаштарчĕ. Фестиваль яланхиллех виçĕ номинаципе иртрĕ. Ачасем тĕрлĕ ушкăнсене пайланса пĕлÿ шайне, пултарулăхне тĕрĕслерĕç. «Чăвашлăх тĕнчи» мультимедийлă презентацисен конкурсĕнче ачасем хăйсен тĕпчев ĕçĕсене хÿтĕлерĕç. 13 шкул хушшинче иртнĕ кĕрешÿре малти вырăна Кристина Никифоровăпа (Хирти Явăш) Татьяна Афанасьева (Хирти Мăнтăр) тухма пултарчĕç. Валерия Кириллова (Нĕркеç), Екатерина Соловьева (Çĕнĕ Мăрат), Анна Шамбулина (Хырай Ĕнел), Снежана Морозова (Хырхĕрри) пухса хатĕрленĕ ĕçсене те палăртса хăвармалла. Ачасем шырав мелĕпе тĕплĕн усă курни, материала пĕлсе вырнаçтарни куç умĕнчех.
«Çăлтăрчăк» вăйă-конкурсра чăваш, вырăс, тутар ачисем «Чĕлхе – халăх мулĕ», «Илемлĕх тĕнчи», «Чăваш çĕр-шывĕн паллă çыннисемпе событийĕсем», «Тупмалли юмахсемпе ваттисен сăмахĕсем», «Пирĕн пултарулăх» станцисенче вăй виçрĕç. Тупăшура Комсомольски 2-мĕш вăтам шкулĕнчи 9б класра вĕренекен Анастасия Шингалова çĕнтерме пултарчĕ. Настя пĕлтĕр те районта малти вырăна тухса республикăра 4-мĕш вырăн йышанма пултарчĕ. Ирина Тимофеева (Комсомольски 1-мĕш вăтам шкулĕ), Гельнэфис Гайзатуллина (Хирти Мăнтăр), Надежда Петрушкина (Александровка), Зухра Гибатдинова (Тукай Мишер), Лейсан Садыкова (Шурут), Реиф Фасхутдинов (Хирти Явăш) та пултарулăхпа палăрчĕç.
«Шевле - 2012» ÿкерчĕксен конкурсне «Тăван халăх историйĕ манăн чĕрере» ятпа Раççĕй историйĕн çулталăкне халалланă. Ку выставкăра чи кăтартуллă ĕçсем – Алла Зайцевăпа (Хырай Ĕнел) Леонид Мальчиков (Комсомольски 1-мĕш вăтам шкулĕ) ÿкерчĕкĕсем.
Районта мала тухнă Кристина Никифорова (ертÿçисем В.Г.Зайцевăпа Л.И.Никифорова), Анастасия Шингалова (ертÿçи С.Г.Индюкова), Алла Зайцева (ертÿçи И.Н.Кокшина) çитес кунсенче республикăри ăмăртăва хутшăнаççĕ. Унта та вĕсем хăйсен пĕлÿ шайне, ăсталăхне, çаврăнăçулăхне кирлĕ таран палăртасса, хастар пуласса шанса ăнăçу сунатпăр.