«Чăваш  çырулăхĕн аталанăвĕнче  эпĕ пилĕк юпа куратăп: Яковлев – Иванов – Ашмарин – Çеçпĕл – Хусанкай. Хусанкай чăваш сăввин сассине Европа культурин çÿллĕхне çити çĕклерĕ», - тенĕ чăвашсен паллă  поэчĕ Митта Ваçлейĕ.

Чăваш сăввине çÿллĕ шая çĕкленĕ  чăваш халăх поэчĕ Петр Петрович Хусанкай  çуралнăранпа 105 çул çитрĕ. Унăн çынлăхлă тата чунлăхлă сăвви-поэмисем  паянхи кун  та вулакансене тыткăнлаççĕ.  «Аптраман тавраш», «Таня» поэмисемпе «Эпир пулнă, пур, пулатпăр!», «Сăмах хăвачĕ», «Мехел», «Тăван чĕлхе» сăввисемпе  ачасем туллин паллашаççĕ, пăхмасăр вĕренеççĕ.

Комсомольски 2-мĕш вăтам шкулĕнче  Петĕр Хусанкая халалласа  8 класра  «Эп чăваш ятне  пăртак çĕклесшĕн…»  ятпа викторина иртрĕ. 7 класра вĕренекенсем «Канăçсăр ман сассăм – самана сассиччĕ» ятпа мультимедиллĕ презентаци хатĕрленĕ. П.Хусанкай пурнăçĕпе ачасене  чăваш чĕлхипе литературине вĕрентекен Боровкова Н.Г. тĕплĕн паллаштарчĕ.  9а класра вĕренекен Татьяна Ивановăпа Мария Павлова, 8 класра вĕренекен Диана Мурзаева, Владимир Квасов поэт сăввисене вуларĕç.

Ытарайми поэтăмăрăн кун-çулĕпе паллашса вĕренекенсем унпа татах та мăнаçланнине пĕлтерчĕç, вĕсен те çырас туртăм çуралнине палăртрĕç. Аслă чĕреллĕ поэтăн çут çăлтăрĕ нихăçан та сÿнмессе чăн-чăнах та шанас килет.